LAOAG CITY – Awanen ti plano ti Commission on Elections (Comelec) nga iyalud-od pay ti voter registration nga agngudo intono Setyembre 30 ita a tawen.
Segun ken ni Comelec Chairman George Garcia, nagtalinaed a nangato ti interes dagiti baro a registrants nga agturong kadagiti registration center wenno local Comelec office tapno agparehistro.
Iti agdama ket naaboten ti komisyon ti 5.3 million a bilang dagiti baro a botante, amang a nangatngato no ikumpara iti nasurok a 3 million a target iti panaglukat ti registration, sumagmamano a bolanen ti napalabas.
Basar iti kaudian a rekord ti komisyon, addan ti 65.9 million a botante a mabalin a makabotos intono 2025 Midterm Elections.
Nagpanawagan met ni Garcia iti nasurok a 5.2 million a botante nga immunan a naikkat iti listaan ken na-deactivate a gundawayan ti nabatbati a panawen tapno agpa-reactivate tapno makabotos iti sumaruno nga eleksyon.
Iti panagngudo ti registration period, target ti komisyon a maabot agingga iti 70 million registered voters.
