LAOAG CITY – Personal a nagatendar ni Vice President Sara Duterte iti panagdengeg iti House Committee on Appropriations mainaig iti P902.8 milyong budget ti opisina na para iti tawen 2026.
Ummunan a naitantan ti panagdengeg iti pondo ti opisina na kalpasan a saan a nakatendar idi ti Bise Presidente.
Idi Setyembre 12 ket saan a nagatendar ni Duterte wenno uray maysa laeng nga undersecretary iti paagdengeg no diket iti assistant secretary ngem saan nga inawat ti komite.
Segun kadagiti agpanpanday linteg, tradisyon iti Kamara a ti mangidaulo iti ahensya wenno maysa nga undersecretary ti rumbeng a sumango iti budget hearing.
Ti Office of the Vice President ket agkidkiddaw ti P902.8 milyon para iti 2026, nangatngato no ikumpara iti P744 milyon nga alokasyon ita a tawen.
Basar iti opisina na, ti nayon a pondo ket mausar iti napalawa a programa ken serbisyo ti opisina na.
Daytoy ti ummuna a papan ni Duterte iti Kamara sipud idi Nobyembre 2024 nga isu ti naudi a panagatendar na iti isyu mainaig iti maipagarop a panangabuso iti pondo ti opisina na.
Kabayatanna, inlawlawag ti bise presidente nga awan ti public funds a nausar kadagiti panagyahe na iti sabali a pagilyan.
Daytoy ket kalpasan met sinaludsod ni Rep. Tinio no mano ti pakabuklan ti pondo a ginastos na kadagiti byahe na.
