LAOAG CITY – Addan iti “campaign mode” dagiti tignay ni Vice President Sara Duterte mainaig iti 2028 presidential race basar ken ni Lanao del Sur 1st District Rep. Zia Alonto Adiong.
Inpetteng ni Adiong a nalawag kadagiti tignay ken rakurak ti Bise Presidente kadagiti tignay protesta pakairamanan ti “Free Duterte Now” idiay The Hague, Netherlands a patpatibkeren daytoy ti suporta dagiti pro-Duterte groups.
Inbatad ti kongresista nga arig agturturongen ni Vice President Sara ti ambision nga agbalin a sumaruno a Presidente kalpasan a nasapa nga inanunsiona ti kandidaturana.
Kabayatanna, maobserbaran ti biahe ni Vice President Sara iti sabali a pagilian manipud Hulio 16 agingga 31 ket kagiddan ti impeachment trial iti Senado mainaig iti maipagarup nga iregularidad iti panaggastos ti P612.5M confidential funds ti Office of the Vice President ken Department of Education.
Kuna ni Adiong nga ad-adda a kalikagum ti prosecution panel a personal a sumango ni Vice President Sara iti panangusig tapno mangngeg ti publiko ti palawagna.
Binabalaw pay ni Adiong a madlaw a likliklikan ni Vice President Sara iti impeachment trial ken ad-adda a pilienna nga agtalinaed iti “comfort zone” daytoy.
