LAOAG CITY – Kwes-kwestyunaran ni Vice President Sara Duterte ti bilang a 30,000 a maipagarop a pimusay iti kampanya kontra illegal a droga ni dati a Presidente Rodrigo Duterte.
Inpetteng na a kasapulan ti natibker nga ebidensya a mangsuporta iti nasao a bilang dagiti pimmusay gaputa agtalinaed a saan a kumbinsido kadagiti nasao nga alegasyon ken kidkiddawen na ti konkreto a datos.
Segun ken ni Vice President Sara, iti agdama ket 181 nga ebidensiya paylaeng ti naipapay ken naisumitir ti prosekusyon iti International Criminal Court (ICC) mainaig kadagiti kaso ti maipagarop a panagpatay iti drug war no sadinno nga inpetteng na nga adayo ti nasao a bilang iti maipagarop a rinibo a bilang dagiti natay nga adda ti pakainaigan ti kampanya kontra illegal a droga.
Innayon na nga iti agdama ket saan pay nga umabot iti 50 ti bilang dagiti nabigbig a biktima.
Kuna na pay a manipod iti nasao a bilang ket 43 paylaeng ti kumpirmado a biktima a katukad ti 43 counts of murder nga adayo iti maipadpadamag a 30,000 nga indibidwal dagiti pimmusay iti babaen ti administrayson Duterte.
