LAOAG CITY – Inrakurak ni Vice President Sara Duterte nga awan pay ti nabukel na a Senate slate para iti 2028 elections, nupay addan ti sumagmamano a personalidad a maipagarop a nangiparipirip nga interesado a makikadwa no agpaidasig a para presidente.
Inbatad ti bise presidente nga awan pay ti pinal listaaan dagiti kandidato para iti senado.
Kuna na a nagtalinaed pay laeng ti saritaan ti possible a panagtitipon ti sumagmamano nga interesado nga indibidual.
Nagkedked met ni Vice President Duterte a nanginagan kadagitoy gapu iti maipagarop a nabara a sitwasyon iti pulitika.
Segun kenkuana, adda dagiti papagayam nga umas-asideg kenkuana a makapaspasar ti panagpangta, harassment, ken panagpila ti kaso.
Innayon na nga ibilang na paylaeng dagitoy kas “presumptive candidates” gapu ta saan pay a nangrugi ti filing ti certificates of candidacy.
Kabayatanna, inadamitir ti bise presidente nga awan pay ti napili na a running mate iti kina presidente.
Kuna na nga iwaragawag na laengen daytoy ni addan ti kandidato a nakasagana a mangkumpirmar ti panagpaidasig na iti nasao a posisyon.
Immunan nga inrakurak ti bise presidente ti plano na nga agpaidasig a para presidente intono 2028 elections.
