LAOAG CITY – Naan-anayen a nakapagsapata ti baro ken maika-15 a bise presidente iti pagilian a Pilipinas a ni Sara Duterte-Carpio.
Daytoy ket kalpasan ti naiyuswat nga inagurasyon iti San Pedro Square iti siudad ti Davao.
Iti nasao nga inagurasyon, nagatendar ti agarup 6,000 a VIP personnel partikular ni outgoing President Rodrigo Duterte kenni incoming president Ferdinand “Bongbong” Marcos Jr., dagiti opisyal ken ambassadors manipod iti nagduduma a pagilian.
Kadua ni bise presidente Duterte-Carpio iti panagsapata na ti ama na a Presidente Duterte ken ina daytoy a ni Elizabeth Zimmerman idinto a ni Supreme Court Justice Ramon Paul Hernando ti mismo a namagsapata iti presidente.
Kabayatanna, iti panagbitla ti bise presidente kalpasan ti panagsapata na, kuna na a kas kenni Dr. Jose Rizal ket masapol nga agbalin a selfless ken natured.
Kuna na a daytoy ti mangpatibker iti sangsangkamaysa a panagbangon kageddan ti kari nga ayaten ken itultuloy nga ayaten ti pagilian a Pilipinas.
Mainaig iti daytoy, kinablaawan ni Duterte-Carpio dagiti amin nga amma ita nga aldaw a nairana a Father’s Day ken pananglagip iti banuar a ni Dr. Jose Rizal.
Mainaig iti daytoy, kuna ti bise presidente nga awan ti madi a mapasamak nu ti amin nga aramid ket adaan ti dedikasyon basar iti kayat ti Diyos.
Kuna na saan nga isuna ti kalaingan ngem awan ti makaabak iti kinatibker ti puso na kas maysa a Pilipino.
Mapatta-patta nga umabot iti 25,000 a tattao dagiti mapatta-patta a nagatendar iti inagurasyon ti bise presidente.
Sakbay ti inagurasyon ket immuna met a naiyuswat ti misa iti mismo a San Pedro Cathedral a mabirokan iti asideg ti San Pedro Sqaure iti City Hall ti Davao nu sadino a kadua met ti bise presidente ti asawa na a ni Atty. Manesses Carpio.
Saan met a nakaatendar iti inagurasyon ni dati a bise presidente Leni Robredo.
