LAOAG CITY – Ibilang ni Bise Presidente Sara Duterte a political harassment ti panang-pull out ni Philippine National Police (PNP) chief Police General Rommel Francisco Marbil kadagiti 75 a polis a security detail-na.
Iti open letter ni Duterte ken ni Marbil, napasamak ti pannaka-pull out dagiti sumagmamano a kameng ti Police Security and Protection Group (PSPG) a nai-assign para iti seguridadna kalpasan a nagikkat daytoy kas sekretario ti Department of Education (DepEd) ken apaman ti panagwaras ti video ni Presidente Ferdinand Marcos Jr. a maipagarup nga agus-usar iti illegal a droga.
Kinuna ni Duterte a nairaman iti relief order dagiti kameng ti Philippine National Police a pagtaltalkan na ken dagitoy ket datin security force ni dati a Presidente Rodrigo Duterte sipud pay idi 2016, ken kakadwa na idan sipud pay idi 2007.
Immunan a pinasingkedan ti Bise Presidente idi napan a lawas a 75 a Police Security and Protection Group a na-assign iti security detail-na ti na-pull-out babaen ti bilin ni Marbil a naipaulog idi Hulio 22, no sadinno nga immunan nga inpettengna a ti bilin ni Marbil ket saan nga makaapektar iti trabahona iti Office of the Vice President.
Nupay kasta, kinuna ti Bise Presidente a saan a kiniddaw ti Philippine National Police ti pull out dagiti kameng ti Police Security and Protection Group tapno manayunan ti puersa ti pulisya iti National Capital Region (NCR).
Inlawlawagna pay a ti Vice Presidential Protection Division (VPPD) ket naaramid iti babaen ti Police Security and Protection Group ken ti National Police Commission (NAPOLCOM), a mangtaginayon iti seguridadna ken dagiti sumaruno a Bise Presidente ti pagilian.
Impasimudaag pay ni Duterte a ti pannaka-pull out dagiti security personnel na ket nangpapeggad iti seguridad ti pamiliana.
Iti met biang ni Marbil, kinuna nga agtultuloy ti panangipaay ti Philippine National Police kadagiti top-tier security services ken ni Duterte.
Inpakaammu pay ni Police Security and Protection Group Director Police Brigadier General William Segun, nga agtaltalinaed ti 31 a kameng ti Philippine National Police a naidestino iti security detail ni Duterte, idinto a dagiti immun-una a 75 a Police Security and Protection Group personnel-na ket naideploy iti National Capital Region Police Office.
Kabayatanna, ti direktiba ni Marbil ket naibasar iti naisayangkat a comprehensive threat assessment, a nangbigbig kadagiti indibidual ken grupo nga adda iti risgo.
