LAOAG CITY – Inrakurak ni Rep. Joel Chua, Chairman ti House Committee on Good Government and Public Accountability a mabuteng ni Vice President Sara Duterte iti panangtingiting ti Senado isut gapuna a nagpetision iti Korte Suprema ti legal team-na tapno lappedan ken naan-anay nga ipasardeng ti proseso ti impeachment.
Inbatadna a ti panangipasa ti petision ti kampo ni Vice President Sara ket paset ti istratehia tapno ibaybayag ti proseso sakbay a maiprisentar dagiti ebidensia ken matingiting.
Inpettengna a ti proseso ti impeachment ti Kamara de Representantes ket preliminary wenno umuna nga addang pay laeng tapno arisiten ti pagibasaran tapno maikabil ti kaso iti Senado nga agserserbi nga impeachment court.
Kunana a ti panangtingiting iti Senado ket mangipaay ken ni Vice President Sara ti oportunidad tapno sangoen a direkta dagiti alegasion, iprisintar ti depensana ke dalusan ti naganna no kalikagumna.
Inlawlawagna a ti pananggandat a lappedan ti proseso ket mangitunda kadagiti seryoso a saludsod mainaig iti pudno a gagem ti kampo ni Vice President Duterte.
