LAOAG CITY – Nakaisumitiren ti pormal a sungbat ni Vice President Sara Duterte iti dua nga impeachment complaints a naipila kontra kenkuana iti House Committee on Justice.
Segun ken ni Committee member ken Bicol Saro Party-list Rep. Terry Ridon, naipasa ti Bise Prssodente ti sungbat na iti oras ti alas-4:30 ti malem idi Lunes, Marso 16.
Iti pagalagadan ti impeachment proceedings, adda ti 10 nga aldaw ti respondent tapno sungbatan ti reklamo kalpasan a naawat na ti abiso.
Gapu ta naawat ni Vice President Duterte ti notice idi Marso 5, ti koma deadline ket Marso 15 ngem naiyalud-od agingga iti Marso 16 gapu ta nairana daytoy iti aldaw ti domingo.
Iti babaen ti House rules, adda ti tallo nga aldaw dagiti complainant tapno agsungbat iti sungbat ti respondent, idinto nga adda ti nayun a tallo nga aldaw ti respondent tapno mangisumitir ti rejoinder karaman dagiti affidavit ken ebidensya.
Karaman kadagiti alegasyon kontra iti bise presidente ket ti maipagarop a saan nga usto a panangusar ti opisina na ti confidential funds ken dadduma pay a possible a panaglabsing iti 1987 Constitution.
