LAOAG CITY – Nakapungtot ni Vice President Sara Duterte iti panangdillaw kenkuana dagiti kritiko na nga isuna ket ‘spoiled brat’.
Daytoy ket kalpasan ti isasango na iti panagdengngeg ti 2025 budget proposal ti Office of the Vice President no sadinno a saan a nagustwan dagiti agpanpanday linteg dagiti sungbat na.
Segun iti Bise presidente, mabalin a saan laeng a narwam dagiti kameng ti kamara de representantes a saanda a maala ti kayatda.
Kuna na pay a saan a naruam dagiti agpanpanday linteg a dagitoy ket masungba-sungbatan nga ibilang da a panangatake kadakuada.
Mamati ni Duterte a nasungbatan na aminen dagiti kalikagom a maamoan dagiti agpanpanday linteg seknan iti budget ti Office of the Vice President.
Ipabus-oy na laengen kadagiti agpanpanday linteg no aprubaran da ti inlungalong da a pondo wenno saan.
Inpetteng pay ni Duterte nga us-usaren laeng dagiti agpanpanday linteg ti panagdengngeg ti budget tapno kritikaren da daytoy.
