LAOAG CITY – Inbatad ni Vice President Sara Duterte a naikkan laeng ti maysa nga oras tapno makita ken makasarita na ti ama na a ni dati a Presidente Rodrigo Duterte a nakadetain iti International Criminal Court (ICC) Detention Center idiay Netherlands gapu iti kaso na a crimes against humanity.
Kuna ti bise presidente a saanna a nakita ti mismo ti nakaibaludan ti ama na gapu ta nagkita da laeng iti visiting area ti pasilidad.
Inbatad na nga iti pannakakita na iti ama na ket naobserbaran na a nakainana a nasayaat ngem ti laeng reklamo na ket kailiw nan ti Filipino food kangrunaan na ti “inun-unan” wenno paksiw.
Inpakaammo ti bise presidente a kiniddaw pay ti dati a presidente nga agsublin a dagus iti Pilipinas ken saanna a panawan ti pagilian.
Inkari met ti bise presidente iti aman na a kalpasan a maurnus na amin dagiti nasken nga aramiden na iti Netherlands kangrunaan na ti pannakabukel ti legal team a tumulong iti sangsangwen a kaso ti dati a presidente ket agawiden ditoy pagilian.
Inpakaammo na pay iti aman na a nadutukan ni British lawyer Nicholas Kaufman kas defense counsel na.
Inbalakad na pay iti ama na a no makarikna ti saan a nasayaat ket pakaammoan na a dagus dagiti medical staff iti detention facility.
Naamoan a ni laeng Bise President Sara ti addaan ti Schengen visa iti pamilya da isut gapuna a nakapan a dagus iti Netherlands, ngem daytoy ita ti as-asikaswen dagiti dadduma a miembro iti pamilya da tapno mapanda mabisita ti dati a presidente.
