LAOAG CITY – Inpasingked ni Presidente Ferdinand Marcos Jr. a saanna nga ikkaten wenno suktan iti puesto ni Vice President Sara Duterte.
Inbatadna a ti saan a panagkinnaawatan ti asawana a ni First Lady Liza ken ni Duterte ket saan nga umdas tapno ikkatenna kas sekretario iti nasao a departamento.
Inlawlawagna a dagiti pasagid ti First Lady ket saan a makaapektar iti panagtrabahoda ken ni Bise Presidente Sara.
Kunana nga amin a Cabinet secretaries ket mabalin a masuktan no saanda nga ar-aramiden dagiti trabahoda wenno saanen a kabaelan pay wenno nagsakit.
Mamati ni Presidente Marcos nga awan ti nasken nga urnusenda ken ni Sara gapu ta maawatanna ti marikrikna ken sentimyento ti asawana kenkuana.
Kunana a saan a naggapu iti pamilia ti pulitiko ti First Lady isu a saan a sanay kadagiti pammabalaw.
Maipalagip nga inbatad ni First Lady Marcos a “bad shot” kenkuana ni Vice President Sara gapu iti panangakusar ti amana ni dati a Presidente Rodrigo Duterte a “bangag” ti Presidente iti maysa a rally idiay Davao City no sadino a nakita nga agkatkatawa pay daytoy.
Gapu iti daytoy, adda dagiti rimuar a panawagan dagiti sumagmamano a pulitiko nga aglusulos iti puesto kas sekretario ti Department of Education ni Sara gapu kadagiti banat ti pamilia daytoy ken ni Presidente Marcos pakairamanan ditoy da Bacolod Mayor Albee Benitez, Manila 3rd district Cong. Joel Chua ken ni dati a Senador Leila de Lima.
