LAOAG CITY – Sinungbatan ni Vice President Sara Duterte iti inpila nga impeachment complaint ti Akbayan kontra kenkuana.
Inbatadna nga awan ti ebidensia a mangipaneknek kadagiti pammabasol nga inpila kontra kenkuana ken daytoy ket panangpulitika laeng.
Ti video message ni Duterte ket naiparuk-at maysa nga aldaw kalpasan nga inpasa ni House Secretary General Cheloy Velicaria-Garafil ti dua nga impeachment complaint kontra kenkuana iti opisina ni House Speaker Faustino “Bojie” Dy III.
Ti umuna a verified complaint ti impeachment ket inpila dagiti miembro ti Makabayan Coalition ken inendorso da ACT Teachers party-list Representative Antonio Tinio, Gabriela Women’s Party Representative Sarah Jane Elago ken Kabataan Party-list Representative Renee Louise Co.
Karaman kadagiti agrekreklamo ket dagiti agdama ken dati nga agpanpanday linteg ken lider nga isuda France Castro, Arlene Brosas, Liza Maza, Neri Colmenares, Renato Reyes Jr., Raymond Palatino ken dadduma pay.
Kabayatanna, ti maikadua nga impeachment complaint ket inendorso da Mamamayang Liberal Party-list Representative Leila de Lima ken Akbayan Party-list Representative Perci Cendaña.
Naammoan a dagiti petitioner ditoy ket manipud kadagiti progresibo nga organisasion ken civil society groups pakairamanan da Francis Joseph “Kiko” Aquino Dee, Sylvia Estrada Claudio, Teresita Quintos Deles, dati nga Ifugao Representative a ni Teodoro Baguilat Jr. ken labor Leader Josua Mata.
