LAOAG CITY – Obligado nga isubli ni Bise Presidente Sara Duterte ken dadduma pay nga opisial ti Office of the Vice President (OVP) iti ₱73,287,000 kalpasan a naibasura ti apela da kontra iti notice of disallowance.
Ti nadakamat a gatad ket paset ti ₱125 milion a confidential funds ti OVP para iti maudi a kuarter ti 2022.
Kabayatan ti House Committee on Justice hearing, inbatad ni COA’s Intelligence and Confidential Funds Audit Office Gloria Camora a saan a nagtungpal ti OVP iti joint circular, partikular iti kinakurang ti dokumento nga ebidensia dagiti bayad.
Segun kenni Justice Committee chair Rep. Gerville Luistro, karaman a rumbeng a maisubli ti ₱375 million manipud iti confidential funds ti 2023 a nadis-allow ti COA.
Basar ti COA, ₱69.7 milion ti saan a napalubosan gapu iti kaawan ti ebidensia kadagiti operasion ti panagsukisok, bayat a ti ₱3.5 milion ket para kadagiti alikamen nga awan ti nalawag a koneksion na kadagiti kompidensial nga aktibidad.
Kabayatanna, kunana a mabalin latta ti agapela ti OVP iti Korte Suprema, bayat nga urayen ti komite ti opisial a kopia ti desision.
