LAOAG CITY – Kinarit ni Vice President Sara Duterte ni Defence Secretary Gilberto “Gibo” Teodoro Jr. a manginaganan kadagiti opisial ti gobierno a maipagarup a “pro-China” wenno mangidepensa iti Beijing mainaig iti isyu ti West Philippine Sea (WPS).
Inrakurak ti Bise Presidente daytoy kalpasan nga inbatad ni Teodoro a rumbeng nga agikkat dagiti opisial ti gobierno a saan a mangsupsuporta iti polisia ti Pilipinas ken makikadkadwa iti China.
Impaganetget ti bise presidente a saan a mabalin nga agaramat ni Teodoro iti pammabasol no saanna a dakamaten dagiti nagan wenno listaan dagiti opisial.
Segun ken ni VP Sara, ti panangaramid kadagiti alegasion ket mangpataud laeng iti saan nga umno nga espekulasion kontra kadagiti dadduma nga opisial nga awan pakainaiganna iti nasao a saritaan.
Innayon ti bise presidente a gapu ta awan ti nalawag nga innagan ni Teodoro ket mabalin nga uray ni Presidente Ferdinand “Bongbong” Marcos Jr. ket mairaman a pagsuspetsaan ti publiko.
