LAOAG CITY – Kinumpirmaran ni National Bureau of Investigation (NBI) Dir. Jaime Santiago a saan a nagatendar ita nga aldaw ni Vice President Sara Duterte.
Inbatad ni Dir. Santiago, babaen iti abogado ni Duterte a ni Atty. Paul Lim, kiniddawna a balbaliw a maiyeskedyul ti panagdengngeg gapu ta naladawna a naammoan a naitantan ti panagdengngeg iti House committee on good government and public accountability.
Immuna iti daytoy, inisyuan ti subpoena ti National Bureau of Investigation ti Bise Presidente kalpasan nga inrakurakna ti panangpangtana kada Pres. Ferdinand Marcos Jr., First Lady Liza Marcos ken Speaker Martin Romualdez.
Kuna ni Vice Pres. Duterte, adda ti nakasaritana a tao a nangibilinanna no mapapatay isuna ket papatayen met dagiti first couple ken ti mangidadaulo ti Kamara.
Ibilang ti Department of Justice (DOJ) a sensitibo nga statement ti dinakamat ti Bise Presidente isu a kalikagumda dagus nga ammoen no adda ti nalabsing a linteg ti maikadua a kangatoan nga opisial ti pagilian.
