LAOAG CITY – Nagpannawagan ni Bise Presidente Sara Duterte ti konkreto nga aksyon ti gobierno tapno suportaran dagiti biktima ti terorismo.
Kinunana a ti pananglagip kadagitoy ket saan laeng koma a babaen ti pananglaglagip wenno panagmennamenna.
Iti video message kagiddan ti International Day of Remembrance and Tribute to the Victims of Terrorism, kinuna ni Duterte nga ammo ti Pilipinas ti magastos ti terorismo kadagiti komunidad a naapektaran iti insurhensia ken naranggas nga extremism.
Kinunana nga adu a komunidad iti Mindanao ken sumagmamano a paset ti pagilian ti agsagsagaba iti panagbomba, panagkikil ken kinaranggas. Kinuna ni Duterte nga agtaltalinaed a kinapudno para iti adu a pamilia ti pangta ti kinaranggas.
Ti panangbigbig kadagiti biktima ket rumbeng a pakairamanan dagiti konkreto nga addang, agraman ti hustisia, pannakaipatungpal ti patakaran ken rehabilitasion
Nagpannawagan pay ni Duterte ti addang tapno masigurado ti kinatalged dagiti komunidad, masalakniban dagiti agtutubo, ken maited ti umdas a suporta kadagiti biktima tapno makaungar.
