LAOAG CITY – Naiget a naglikudan ni Vice President Sara Duterte dagiti nagbalin a rakurak ni Rodulfo Gracioso Jr. a mangikonkonektar kenkuana kadagiti insidente a saanna nga inaramid, saanna pulos a naamoan wenno napasaran a personal.
Iti naisayangkat a press conference iti Davao City, binasa ti bise presidente ti affidavit na a nangsungbatan na kadagiti akusasyon ni Gracioso.
Kuna na pay nga opisyal nga ipila ti kampo na ti nasao nga affidavit intono Huwebes, Oktubre 8.
Malaksid iti daytoy, inlawlawag ti bise presidente a saan nga agpalawag wenno sumungbat kadagiti isyunga adda ti pakainaigan iti agdama nga impeachment trial ken dagiti akusasyon nga ibatbato ni dati a senador Antonio Trillanes IV.
Inpaganetget ti kampo na a gagem ti opisyal a panagsungbat na a lawlawagan ti kinapudno iti baet dagiti agwarwaras nga alegasyon kabayatan nga isagsagana da dagiti maiyannatop nga addang kas maiyallubog iti linteg.
