LAOAG CITY – Walo dagiti natay idinto nga adda ti sumagmamano a nasugsugatan kalpasan ti panagpalto-paltog ti maysa a lalaki iti maysa a mall idiay Dallas, Texas.
Basar kadagiti otoridad, karaman kadagiti biktima ket ubbing.
Kabayatanna, napatay ti suspek bayat ti panagresponde dagiti otoridad ken dagus naibakwit dagiti tattao nga adda iti mall.
Iti video footage nga inpublikar dagiti otoridad, naruay a shoppers ti nagtataray a rimuar iti mall gapu iti pammaltog ken adda ti naibati a dara dagiti biktima iti sidewalks ti ruar ti mall.
Kabayatanna, agpapan a maisursurat ti damag ket saan pay a nabigbi ti suspek ken am-amoen da ti motibo iti panagpalto-paltog.
Maipalagip a saanen a daytoy ti umuna a mass shooting a napasamak iti United States nu sadino nga umaboten iti 198 ti nairekord ita a tawen 2023.
