LAOAG CITY – Natiliw dagiti walo nga agpapada a lallaki gapu iti panagsusugal iti maysa a minatayan iti Brgy. 22, Boyboy iti ili ti Piddig.
Daytoy ti kinumpirmaran ni Police Lieutenant Donaldson Pagalanan, ti OIC ti PNP Piddig.
Segun kenkuana, nabigbig dagiti suspek nga agtawen ti 25, 23, 28, 65, 45, 45, 46 ken 30.
Inpakaammona a dagiti pito ket residente ti Brgy. 22, Boyboy iti nasao nga ili idinto a ti maysa ket agnanaed iti Brgy. San Esteban iti ili ti Dingras.
Kinunana a kaadduan kadagitoy ket mannalon, construction worker, driver ken security guard.
Inbatad ni Police Lieutenant Pagalanan, nakumpiskar ti 580 pesos a nagbalin a taya dagiti nagsusugal pakairamanan ti 52 pcs. a cards ti baraha a pinagay-ayamanda ti rakatap, 8 a monoblock a tugaw ken maysa a monoblock a lamisaan.
Gapu iti daytoy, inlawlawagna a manamnama a sumango dagiti walo a suspek ti Presidential Decree 1602 wenno Anti-Illegal Gambling Law.
Kunana a mabalin nga agpiyansa dagiti nasao a suspek ti tallopulo a ribu a pisos kas sukat iti temporario a pannakawayawayada no bilang aprobaran daytoy ti Provincial Prosecutor’s Office.
Kabayatanna, innayon ti OIC ti PNP-Piddig a nagtalinaed dagiti suspek iti pagbaludan ti kuerpo ti pulisia.
