LAOAG CITY – Inkari dagiti walo a manufacturer ditoy pagilyan nga ipatungpalda ti price freeze kas suporta kadagiti konsumidor a Pilipino gapu pay laeng ti nagbalin nga epekto ti El Niño iti pagilian, segun iti Department of Trade and Industry (DTI).
Karaman kadagiti pakaipakatan iti price freeze order ket dagiti 31 nga stock-keeping units (SKU) dagiti de-lata, naproseso a gatas ken naibotelia a danum, karaman pay ti instant noodles, kape ken condiments.
Agpaut agingga iti Hulio 10, 2024 ti prize freeze kadagiti kangrunaan a kasapulan ken prime commodities, no sadinno ket manamnama ti naiget a panagmonitor ti Department of Trade and Industry.
Malaksid pay daytoy iti immun-una a naipatungpal nga automatic price freeze kadagiti probinsia ken munisipalidad ditoy pagilian, nga agpaut agingga iti 60 nga aldaw, partikular kadagiti lugar a naipasidong iti state of calamity ken state of emergency, maitunos iti Republic Act 7581 wenno Price Act.
