LAOAG CITY – Balligi ti pannakaisayangkat ti “Run Against Contribution Evader” wenno RACE ti Social Security System (SSS).
Segun ken ni Mr. Richard Raralio, Branch Head II ti nasao a pangopisinaan, naiyuswat ti a “Run Agaisnt Contribution Evader” babaen iti pannakabukel ti grupo dagiti empleado ti Social Security System a bimmisita kadagiti pasdek-negosio iti cuidad ti Laoag ken San Nicolas.
Inbatadna nga umabot iti uppat nga employers ti nabisitada ditoy cuidad idinto nga uppat met iti ili ti San Nicolas ti saan a mangipapaay ti umiso a benepisio kadagiti empleado nga agpapaay kadakuada.
Kunana nga iti sumaruno a bulan ket isu manen ti pannakaisayangkat ti nasao nga aktibidad nangruna ket naruay pay dagiti makaimaldit iti record-da nga agsalsalungasing iti pagannurutan nga ipatpatungpal ti Social Security System.
Inlawlawagna a dagiti maseknan a pasdek-negosio a nabisitada ket pakaukkon da ti pakabuklan a 797, 960 a pisos.
Mainaig iti daytoy, binulanda nga isayayangkat ti nasao nga aktibidad ken narugian daytoy idi bulan ti Pebrero, no sadinno nga adda 11 a nagcomply, 9 kadakuada ket nakabayden, idinto a dagiti dadduma ket partial pay laeng.
Sumagmamano kadagiti binisita da a pasdek-negosio ket tallo a food industries, dua nga hotel, ken maysa a gasoline station.
Kabayatanna inbatad met ni Atty. Blesselda M. Acosta Department Manager III, Luzon North-I Legal Department a nangato ti penalty da no agsalungasingda iti pagannurutan ti ahensya, ken mabalin da pay ti maibalud iti uneg ti inem a tawen agingga 12 a tawen, isu a gutgutiguten na dagiti business owners nga agcomply.
