LAOAG CITY – Napilaanen ti kaso dagiti walo a tattao a naaktwan dagiti otoridad nga agsusugal idiay Barangay 10, Estancia, Pasuquin, Ilocos Norte.
Binigbig ni Police Major Marlon Padamada, ti chief of police iti ili ti Pasuquin dagiti suspek a da Jenifer Cariño y Lubera, 37; Efremelyn Lubera y Salmon, 41; Janet Sahagun y Cariño, 31; Raymund Ventura y Ramos, 26; Rosalina Ramos y Cardona, 43; Remedios Salvador y Lubera, 53; Jeanalyn Salmon nee Patacsil, 28 ken ni Maricel Cacacting nee Lubera, 33.
Nakumpiskar dagiti otoridad iti lugar ti 195 a pisos a taya dagiti maseknan, 58 a pedaso iti baraha, walo a plastic mono block, ken maysa a plastik a lamisaan.
Segun ken ni Padama, linagip ti pamilya Novira ti death anniversary ti kameng ti pamilya da.
Inbatad na a kas paset ti pananglagip ti nasao a pamilya ti ipupusay ti ti maysa a miembro da ket nagay-ayam dagiti walo a tattao iti baraha.
Innayon na nga indanun met kadakuada ti maysa a concerned citizen ti ar-aramiden dagiti maseknan isut gapuna a dagus da a napan nagresponde.
Kuna na a ditoy a naaktwan da ti panagsusugal dagiti suspek.
