LAOAG CITY – Natiliw dagiti walo a senior citizen a nagsusugal ken dua dagiti nakataray babaen ti naiwayat nga anti illegal gambling operation iti maysa a minatay iti Brgy Badio iti ili ti Pinili.
Segun kenni Police Major Jephre Taccad, hepe ti PNP Pinili, nakita da iti aktual a panagsusugal dagiti maseknan nga ay-ayam da ti tong-its.
Nakumpiskar dagiti otoridad dagiti lamisaan, tugaw, baraha, ken pusta nga umabot iti 10,372.
Nabigbig dagiti walo a natiliw a da Danilo Palado, agtawen ti 63, Fredie Saturnino agtawen ti 63, Carlito Valenzuela agtawen ti 64, Romy Saturnino agtawen ti 69, Ismael Pascua agtawen ti 76, Emmanuel Viloria agtawen ti 59, Onofre Arzadon agtawen ti 65, kenni Virgilio Saludes agtawen ti 64 agpapada a taga Pinili.
Agtultuloy a mabirbirok da Joseph Anama kenni Mely Pacariem kalpasan ti operasyon dagiti otoridad.
Posible a sumango dagiti maseknan ti panagsalungsing iti PD 1602 gapu ti akto a panagsusugal da.
Iti mainaig a damag, kinumpirmaran ni Police Major Jephre Taccad, hepe ti PNP Pinili, a sakbay ti operasyon iti Brgy Badio, ket napaayaban iti ABC Hall babaen kenni ABC President Renato Fernandez.
Daytoy ket mainaig iti pannakaipawil ti anyaman a klase ti sugal iti minatayan nupay nagbalin a parte ti kultura dagiti Ilokano.
Kuna na a babaen met ti paglintegan ken pammilin ni Presidente Rodrigo Duterte ket kasapulan a maipasardeng dagitoy.
Segun kenni Taccad, sakbay iti operasyon ket nakasarita na dagiti opisyal ti barangay mainaig iti pannakaipadamag kadagiti kabarangayan da a maipawil ti panagsusugal.
Kinumpirmaran na a naisawang dagiti sumagmamano nga opisyal ti barangay ti kaadda ti minatayan iti lugar da.
Innayon ni Taccad nga iti Brgy. Badio laeng dagiti naaktuan da nga adda dagiti nagsusugal bayat iti panagbisita da.
