LAOAG CITY – Umabot iti walo a tattao ti natay kalpasan a bimmagsak ti hot air balloon iti Praia Grande, Santa Catarina, Barzil.
Basar kadagiti otoridad, adda ti pakabuklan a 21 a tattao a nakalugan iti nasao nga air balloon ken 13 ditoy ti nakalasat pakairamanan ti piloto.
Inbatad dagiti otoridad a nangrugi ti uram iti uneg ti basket balloon, isut gapuna a dagus nga inbaba ti piloto.
Nupay kasta, kabayatan nga umas-asideg iti daga ken inbilin ti piloto nga agtapwak dagiti pasahero ngem saan da a naaramid daytoy sakbay a dimmakkel ti apoy.
Gapu iti kinadagsen ket nagpangato manen ti balloon kalpasan na ket bigla a nagpababa a nakatayan ti walo a nakalugan.
Karaman kadagiti natay ket dagiti agayan-ayat, agina, maysa a doctor ken maysa a figure skater idinto a dagiti nakalasat ket naikabil da amin iti kaasitgan nga ospital.
Kabayatanna, indanun ni Brazilian President Luiz Inácio Lula da Silva ti pannakipagladingit na iti napasamak ken inkari na a mangipaay ti tulong ti gobiero para kadagiti biktima.
Naamoan a ti Praia Grande ket maysa a mabigbig a destinasyon dagiti turista para iti hot air balloon.
