LAOAG CITY – Inyuswat ti Social Security System (SSS) ditoy ciudad ti Laoag ti maysa a programa a napaulwan ti Run After Contribution Evaders (RACE).
Inlawlawag ni Mr. Richard Raralio, Branch Head II ti ahensya ditoy ciudad ti Laoag a gagem ti nasao a programa a bisitaen dagiti nagduduma nga establisimiento.
Daytoy ket tapno amwen kadagiti employers no mabaybayadan da met laeng ti usto a kontribusyon dagiti empleado da iti Social Security System.
Segun kenni Raralio, adda ti walo nga establisimiento a binisita da no sadinno nga agpapada amin dagitoy a napaay a nagbayad ti kontribusyon dagiti empleado da.
Gapu iti daytoy, inpakaammo ni Raralio nga inikkan da ti 15 nga aldaw dagiti walo nga establisimiento tapno agcomply no sadinno a mabalin da nga in-inutan a bayadan dagiti kontribusyon dagiti trabahador da.
Inbatad ni Raralio nga umabot iti 4.3 milyon a pisos ti makolektar da kadagiti walo nga establisimiento.
