LAOAG CITY – Adda ti walo nga indibidual ti natay gapu iti nalawa a panaglayos iti estado ti Kentucky idiay Estados Unidos.
Segun ken ni Kentucky Governor Andy Beshear, naruay a pagtaengan ti nalayos pakairamanan dagiti flights.
Naammoan a ti dua kadagiti pimmusay ket gapu iti traffic accident gubuay iti napigsa a panagtudo idinto a sumagmamano kadagiti nataengan ken maysa nga ubing ti natay gapu iti layos.
Naisalakan dagiti otoridad ti sumurok maysa a ribu a tattao no sadinno a dakkel ti posibilidadna a manayonan pay ti bilang dagiti natay.
Mainaig iti daytoy, gapu iti dakes a paniempo ket naputed ti suplay ti kuriente a nakaapektar iti naruay a residente.
Maipalagip a kadagiti naglabas nga aldaw ket arig nabungon ti yelo ti northeastern ti Estados Unidos pakairamanan ti Ontario ken Quebec idiay Canada.
