LAOAG CITY – Balligi ti naiyuswat nga illegal drag race operation iti bypass road partikular ti Barangay Vira ditoy ciudad ti Laoag a nakatiliwan dagiti walo nga indibidual.
Daytoy ti kinumpirmaran ni Police Senior Master Sergeant Eric Bumagat, ti hepe Philippine National Police – Traffic Division ditoy ciudad ti Laoag.
Inlawlawag ni Bumagat nga idi rabii ti Lunes, Oktubre 23 nakaawat da ti report mainaig ti illegal drag race iti bypass road.
Segun kenni Bumagat, manarimaan metten ti pannakaiproseso ti kaso a maipila kontra kadagiti walo a natiliw.
Mainaig iti daytoy, inbatad na a kinumpiskar da pay dagiti motorsiklo dagiti maseknan ken sumagmamano kadagitoy ket awanan pay ti lisensya ken awan ti safet gear nga inusar da.
Inlawlawag ni Bumagat nga agmulta ti sangribo a pisos dagiti matiliwan nga awanan ti suot nga helmet wenno proper safety gear, ken tallo ribo a pisos met no awanan ti lisensya.
Kabayatanna, inrakurak na a naiget ti pinagpatrolya da nangruna ti rabii gapu ta ado latta dagiti saan a maisuro no maipappan ti drag racing.
Binalakadan na pay dagiti nagannak a kitaen da dagiti annak da wenno kameng ti pamilya da gapo ta delikado ti drag racing.
