LAOAG CITY – Manamnama a maipila ita nga aldaw ti reklamo a panaglabsing iti Presidential Decree (PD) 1906 wenno illegal gambling kontra kadagiti walo nga indibidual a natiliw gapu iti illegal a panagsusugal da iti maysa a minatayan iti Barangay Pasil iti ili ti Paoay.
Basar iti report, nagreponde a dagus dagiti otoridad kalpasan nga adda ti naawat da a report mainaig iti kaadda dagiti agsusugal iti mansayag ni Daniela Ayque.
Naaktwan a mismo dagiti otoridad ti panagay-ayam dagiti suspek no sadinno nga iti maysa a lamisaan ket agay-ayam da ti Lucky 9 ken idinto a ti maysa a lamisaan ket agay-ayam ti Pepito.
Nakumpiskar dagiti otoridad iti umuna a lamisaan ti 40 a pedaso a baraha, 17 a tugaw, lamisaan, table cloth ken ti 5, 760.00 a maipagarop a pusta dagiti suspek.
Kabayatanna, nakumpiskar met dagiti otoridad iti maikadwa a lamisaan ti 52 a pedaso a baraha, 10 a tugaw, lamisaan, maysa a dining plante ken ti maipagarop a pusta dagiti maseknan nga umabot iti 2,790 a pisos.
Inpakaammo dagiti otoridad nga adda pay ti dua a suspek a nakalibas iti naiyuswat nga operasyon.
