LAOAG CITY – Nagballigi dagiti otoridad a nangtiliw iti ili ti Paoay ti maysa a wanted person a nabayagen nga aglemlemmeng ditoy probinsya.
Binigbig ni Police Major Eddie Suyat, ti chief of police iti ili ti Paoay ti suspek a ni Emerson Menor, agtawen ti 45, naasawaan, mannalon ken residente iti Barangay Paratong iti nasao nga ili.
Ti pannakatiliw ni Menor ket babaen ti bileg ti warrant of arrest nga inparuk-at ni Executive Judge Leo Reyes RTC Branch 12 iti Sanchez Mira Cagayan gapu iti panagsalungasing na iti Presidential Decree (PD) 705 wenno illegal logging.
Nairekomendar ti 40 ribo a pisos a piyansa ti suspek para iti temporaryo a pannakawaya-waya na.
Iti agdama, nagtalinaed ni Menor iti kustodyar ti PNP-Paoay ken manamnama a maisubli iti korte a naggapwan ti warrant of arrest.
