LAOAG CITY – Inpakaammo ni PMaj. Jephre Taccad a balligi a naarestar iti ili ti San Nicolas ti maysa a wanted person a maysa a mannalon kalpasan a naglemmeng iti nasurok tallo a dekada.
Segun ken ni Taccad, ti suspek ket agtawen ti 56, mannalon ken tubo iti Brgy. Zamboanga ditoy siudad ti Laoag.
Kuna na a sumagsango ti suspek ti kaso a rape a naipila idi 1986 ngem napasamak ti panagramed idi 1985.
Mainaig iti daytoy, inbatad ni Taccad a sinaludaran ni provincial director PCol. Julius Suriben ti balligi nga operasyon dagiti otoridad.
Kabayatanna, kuna na a nairekomendaran ti suspek ti 40,000 a pisos a piyansa para iti temporaryo a pannakawaya-waya na.
Immuna iti daytoy, kuna ni Taccad a dagiti team a nagtitinnulong iti pannakaarestar ti suspek ket ti Provincial Special Enforcement Team, San Nicolas PNP, Provincial Intelligence Unit, RMP ken Special Action Force.
