LAOAG CITY – Nagballigi dagiti kameng ti Philippine National Police (PNP) a nangtiliw iti ili ti Malalay iti probinsya ti Quezon iti maysa a wanted person a taga San Nicolas, Ilocos Norte.
Binigbig ni Police Major Joseph Baltazar, ti chief of police iti ili ti San Nicolas ti akusado a ni Jerome Abellano, taga Barangay 9 iti ili ti San Nicolas.
Segun ken ni Baltazar, sumangsango ti kaso nga estafa sipud pay idi 2013 ni Abellano ngem ita laeng a naiparuk-at ti warrant of arrest kontra kenkuana.
Inbaga na a nairekomendar ti 18 ribo a pisos a piyansa ti akusado para iti temporaryo a pannakawaya-waya na.
Inlawlawag ni Baltazar a pinilaan ti Vertex ti estafa ti dati da nga empleado a ni Abellano kalpasan nga adda ti nadispalko na a kwarta ti nasao a pasdek negosyo.
Innayon na a ti palawag kadakuada ni Abellano, nagsasarita da idin iti nasao a pasdek negosyo ngem dina inpagarop a naituloy ti pannakaipila ti kaso kontra kenkuana.
Kabayatanna, iti eksklusibo nga interview ti Bombo Radyo Laoag ken ni Abellano, inadmitir na nga adda ti nagastos na a kwarta ti nagpaayan na a pasdek negosyo ken saan na a dagus a naurnus agingga a naiparuk-atan ti warrant of arrest.
Inpakaammo na a nakasagana a mangsango ken saanna pulos a nalipatan ti naaramid na no sadinno nga inkari na a sublianan na daytoy.
