LAOAG CITY – Nagballigi dagiti otoridad a nangarestar ti maysa a wanted person iti Barangay Upon iti ili ti Pinili.
Segun ken ni Police Major Sheryl Guzman, ti pannakangiwat iti Ilocos NOrte Police Provincial Office, ti akusado ket agtawen ti 63 a lalaki, naasawaan ken residente iti nadakamat a barangay.
Naarestar ti akusado babaen ti bileg ti warrant of arrest nga inparuk-at ni Hon. Felix Gabriel Salvador, Presiding Judge iti Regional Trial Court, First Judicial Region, Branch 17, iti Batac City gapu iti kaso na a panaglabsing iti Republic Act 10591 wenno ti Comprehensive Law on Firearms and Ammunition Act.
Nairekomendar ti 80 ribo a pisos a pagpiyansa ti akusado para iti temporaryo a pannakawaya-waya na.
Mainaig iti daytoy, kabayatan iti panangkapkap dagiti otoridad iti akusado apaman a nakemmeg da ket nakakumpiskar da iti tallo a pedaso ti heat-sealed transparent plastic a sachet a naglaon ti maatap a shabu ken dagiti drug paraphernalia.
Iti agdama, nagtalinaed ti akusado iti Criminal Investigation and Detection Group ken sumango iti kaso a panaglabsing iti Republic Act 9165 wenno Comprehensive Dangerous Drugs Act of 2002.
