LAOAG CITY – Naarestar ti maysa a wanted person iti nagbedngan ti Turod iti ili ti Badoc ken Sinait, Ilocos Sur.
Binigbig ni Police Capt. Joseph Tayaban, ti chief of police iti ili ti Badoc ti suspek a ni John Ashley Gambalan, residente iti Barangay Pimentel iti ciudad ti Batac.
Inlawlawag na a kalpasan a nakaawat ti impormasyon nga aglemlemmeng iti masakupan da a lugar ti nasao a suspek ket nagturong da a dagus kadwa da ti Intelligence Branch ti Ilocos Norte.
Inbatad na a ginandat pay laeng ti suspek ti aglibas ngem saan a nagballigi gapu ta plinano da a naimbag no kasano da a tiliwen ni Gambalan.
Ti suspek ket napilaan ti kaso a panaglabsing ti Republic Act 10591 gapu iti illegal a panagikot na ti paltog.
Nairekomendar ti 100 a ribo a pisos a piyansa ti suspek para iti temporaryo a pannakawaya-waya na.
