LAOAG CITY – Naarestar ti maysa a wanted person iti ili ti San Nicolas.
Segun ken ni Police Major Reginaldo Dalipias Jr., Hepe ti Philippine National Police iti nasao nga ili, nabigbig ti suspek nga agtawen iti 30, awanan asawa ken residente iti Brgy. 31 Talingaan ditoy siudad ti Laoag.
Inbatadna a naarestar ti akusado babaen iti bileg ti warrant of arrest a napetsaan idi Hunio 11, 2024 iti Brgy. 2, San Baltazar iti ili ti San Nicolas nga inparuk-at ni Hon. Marty Cachapero, Presiding ti Judge ti Municipal Trial Court iti nadakamat nga ili gapu iti panaglabsingna iti Reckless Imprudence Resulting in Damage to Property.
Inlawlawagna a nairekomendar iti suspek ti 30 a ribu a pisos para iti temporario a pannakawayawayana.
Innayonna a balligi a natiliw ti suspek babaen iti nagtitipon a puersa ti Paoay Municipal Police Station, PIU-INPPO, PIT-Ilocos Norte, INCIDT, 101st MC, RMFB1 ken 114 Special Action Company/11 Special Action Battalion.
