LAOAG CITY – Natiliw ti maysa a wanted person ditoy probinsya nga adda iti listaan ti Provincial Anti-Partisan Armed Group and Dangerous Drug Council wenno PAPAGDDC.
Nabigbig ti akusado a ni Ruel Ibuos y Guzman, agtawen ti 38, awanan ti asawan ken Officer-in Charge ti Security Agency iti St. Rosa Village idiay Laguna.
Ti nasao nga akusado ket natiliw babaen ti bileg ti warrant of arrest nga inparuk-at ni Hon. Judge Rosemarie Ramos iti RTC Branch 65 ditoy ciudad ti Laoag nga inserbi ti nagtitipon a pwersa ti Provincial Intelligence Unit ti Ilocos Norte Police Provincial Office (INPPO), CIDG, ken ti PNP-Badoc gapu iti kaso na a frustrated murder.
Nairekomendar ti 200 a ribo a pisos a pagpiyansa ti akusado para iti temporaryo a pannakawaya-waya na.
Immunan nga inbatad ni Police Lt. Col. Jonathan Papay, ti mangidadaulo iti Provincial Intelligence Unit iti INPPO a ti nasao nga akusado ket adda ti pinaltugan na idi 2013, kalpasan na ket nagtalapwagaw a napan idiay Laguna.
Innayon na a kabayatan ti kaadda ti akusado idiay Laguna ket binaliwan na ti nagan na no sadinno nga indaulwan na pay ti maysa a security agency iti nasao a lugar.
