LAOAG CITY – Kinumpirmaran ni Police Chief Inspector Roldan Suitos, ti chief of police iti Pasuquin, Ilocos Norte ti pannakatiliw da ti maysa a wanted person iti Barangay Naglicuan ti nasao nga ili.
Nabigbig ti suspek a ni Raegan Bornales, addaan ti live-in partner, taga Barangay Nalvo ngem agdama nga agnanaed iti Barangay Naglicuan iti ili a Pasuquin.
Segun ken ni Suitos, natiliw ti suspek babaen ti bileg ti maysa a warrant of arrest gapu ti kaso na a rape.
Inbatad ni Suitos a ti nagbalin a biktima ni Bornales ket maysa a menor de edad a napasamak idi Mayo ita a tawen iti met laeng Barangay Nalvo.
Inlawlawag na nga iti panangkapkap da ken ni Bornales ket nakaala da iti bulsa na iti tallo a bala ti kalibre 45 ken dua a bala ti M16 armalite.
Iti naidanun kadakuada nga impormasyon ket adda dagiti ik-ikutan ti suspek a paltog, ngem awan ti naala da kenkuana iti panangiserbi da ti warrant of arrest kontra kenkuana.
Gapu ti daytoy, manamnama a mapilaan manen ti suspek iti kaso a panaglabsing iti Republic Act 10591.
Innayon na a ti panangiserbi da ti warrant of arrest ket naimatangan dagiti opisyal ti nasao a barangay.
Awan ti nairekomendar a pagpiyansa ti suspek iti kaso na a rape.
Inpakaammo ni Suitos nga immunan a natiliw ti suspek gapu ti kaso na nga estafa.
