LAOAG CITY – Inpakaammo ni Dr. Melvin Manuel, ti mangidadaulo iti City Disaster Risk Reduction and Management Office ditoy ciudad ti Laoag a nangrugin ti panangisayangkat da ti Water and Rescue Training ditoy ciudad.
Segun kenkuana, adda ti 18 a partisipante a naggapo kadagiti nagduduma a sektor kas iti Philippine National Police, City Disaster Risk Reduction and Management Office, Barangay Officials, dagiti agpaay kadagiti beach resorts ken dadduma pay.
Inbatad ni Manuel a dumalan dagitoy iti lima nga aldaw a panagsanay iti panag-rescue iti nagduduma ng insidente kas iti pannakalmes.
Kunana a saan laeng a ti panagsanay ti rumbeng a maaramid no di ket napateg pay ti pannakaipaay ti naan-anay a kagamitan iti panagresponde ken panangsalbar ti biag ti maysa a tao.
Innayon na a napintas daytoy nga addang tapno maipasigurado a natalged ti tunggal maysa ken al-alisto iti pannakaidanun ti tulong kadagiti agkasapolan, aglalo no adda ti emergency.
