LAOAG CITY – Inpakaammo ni Sangguniang Panlungsod Member Handy Lao ditoy siudad ti Laoag a kalepleppas ti naiyuswat a panagdengngeg iti City Ordinance No. 006 maipanggep kadagiti water lily weavers iti Brgy. Cataban ditoy siudad.
Segun kenkuana, personal a nakasarsaritada dagiti maseknan tapno maammoan no ania pay ti kalikagumda a mainayun iti nailanad nga ordinansa.
Inbatadna a gagem dagiti maseknan a maitipon ti Department of Labor and Employment (DOLE), Department of Trade and Industry (DTI) ken Department of Science and Technology (DOST).
Inlawlawagna a babaen iti daytoy ket matulungan ti gobierno dagiti maseknan nga umili nga ad-adda pay a makaallukoyda kadagiti turista wenno gangganaet a bumisita ditoy siudad ti Laoag.
Kunana a ti kangrunaan a kiniddaw dagiti maseknan a water lily weavers ket ti makinaria nga usarenda iti panangaramid kadagiti produktoda.
Innayonna a kasapulanda pay a dumalan iti panagsanay tapno makaaramidda ti dadduma pay a klase ti produktoda.
