LAOAG CITY – Mangisaysayangkat ti water rationing ti Bureau of Fire Protection iti ili ti Solsona kadagiti sumagmamano a barangay iti nasao nga ili gapu ta awanen ti suplay ti danum iti lugarda kagiddan ti agdama a mapaspasaran nga El Niño phenomenon.
Segun ken ni Senior Fire Officer 3 Venner Adina, ti Municipal Fire Marshal iti Bureau of Fire Protection iti nasao nga ili, adu dagiti barangay ti agkidkiddaw iti water rationing kadakuada pakairamanan ti Barangay Mariquet, Barangay Talugtog, Barangay Bubuos ken dadduma pay.
Inbatadna a malaksid kadagiti residential areas ket agkapulan pay ti water rationing dagiti sumagmamano a pagadalan kas ti Talugtog National High School ken Solsona National High School pakairamanan dagiti nagduduma pay a pangopisinaan iti nadakamat nga ili.
Inlawlawagna nga adu a pagtaengan ti naatsiananen dagiti bubonda gapu iti nakaro nga epekto ti weather phenomenon ditoy probinsia.
Gapu iti daytoy, kunana nga inaldaw ti panangrasionda kadagiti maseknan a barangay, pagadalan ken pangopisinaan babaen kadagiti dua a fire truck-da ken maysa a truck manipod iti Municipal Agriculture Office idinto a naka-standby met ti maysa pay a fire truck-da para iti emergency purposes.
Innayonna a tunggal madanon ti panawen ti kalgaw ket makapasarda ti panagpukaw ti suplay ti danum.
