LAOAG CITY – Balligi a naarestar ti maysa a welder kalpasan a naalaan ti sumurok-kumurang 300 a gramo ti maipagarup a shabu nga agbalor ti P2,040,000.00 iti Barangay 3 San Baltazar iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, nabigbig ti suspek a ni Donden Mark Antonio, agtawen ti 31, awanan asawa ken residente ti Barangay Root iti ili ti Dingras.
Inbatadna a natiliw ti suspek kalpasan a naala dagiti otoridad ti tallo nga ice bag no sadinno a maysa a medium heat-sealed transparent plastic sachet ken dua nga heat-sealed transparent plastic sachets nga agpapada a naglaon ti maatap a shabu.
Malaksid iti daytoy, naala pay manipud iti suspek ti maysa a glass tooter a naglaon ti white residue, maysa a plastic packaging a naglaon ti white residue, maysa a digital weighing scale, dua a packs ti open transparent plastic sachet ken dadduma pay a drug paraphernalia.
Inlawlawag ni P/Capt. Damo a maibilang nga Street Level Individual ti suspek ngem gapu iti kaadu ti nakumpiskar a droga manipud kenkuana ket ibilangda daytoyen kas High Value Individual.
Kabayatanna, naammoan a drug surrenderee ti suspek ken addan ti dua a bulan nga imonmonitor dagiti otoridad.
Iti agdama, mapilaan ti kaso gapu iti panaglabsing iti Republic Act No. 9165 wenno ti Comprehensive Dangerous Drugs Act of 2002 ti naarestar a suspek.
