LAOAG CITY – Kiniddaw ni Dr. Tedros Adhanom Ghebreyesus, Director-General ti World Health Organization (WHO), iti gobyerno ti Russia a mangipaay ti detalyado nga impormasyon seknan iti pannakatay ti maysa a lab worker iti Siberian plague research unit, ken detalye maipapan iti naisayangkat a laboratory tests.
Agkidkiddaw pay ti kanayunan a detalye seknan iti inpatungpal ti Russia a public health measures, ania iti health status dagiti nagbalin a contact ti natay nga empleyado, ken no pudno nga adda ti maikadwa nga empleyado a na-infect iti ibilang na a “pneumonia of undetermined cause.”
Inaramid ni Dr. Tedros iti panawagan kabayatan ti insayangkat a press briefing ti WHO kalpasan ti pannakatay ti agtawen ti 27 nga empleado a babai idiay Irkutsk Anti-plague Research Institute idiay Siberia ken posibilidad a pneumonic plague idiay Far East.
Ti nasao nga empleyado ket na-ospital idiay Shelekhov Hospital idi Setyembre 29 nga addaan ti simtomas ti sakit a pneumonia, naikkan ti ventilator ngem pimmusay kalpasan ti sumagmamano nga aldaw, maibasar iti media reports.
Segun kenni Dr. Tedros, nagsaludsud ti WHO iti Russia idi Sabado ken naawat da ti sungbat idi kalman, Miyerkoles a mangibagbaga nga “awan ti kaso ti plague idiay Irkutsk Oblast” a pakasarakan ti nasao a research unit ken nakaipasidongan ti quarantine iti aganay 200 a contact ti nasao a lab worker.
