LAOAG CITY – Ginutigot ti World Health Organization dagiti vaccine manufacturer nga iyalisto ti produksion ti mpox vaccine kagiddan ti pagam-amkan a panagadu pay ti kaso daytoy.
Basar iti World Health Organization, saan nga umdas ti agdama a suplay ti bakuna tapno malappedan ti panagwaras ti nasao a sakit a manarimaanen a makaap-apektar kadagiti sumagmamano a pagilian idiay Africa.
Inallukoy pay ti World Health Organization dagiti pagilian nga addaan ti suplay ti bakuna nga idonarda pay laeng dagitoy kadagiti pagilian nga ad-adda nga agkasapulan.
Maibasar iti International Health Agency, iti agdama ket addaan ti 500,000 dose ti Modified Vaccinia Ankara-Bavarian Nordic (MVA-BN) mpox vaccine ngem adda pay ti kapabilidad ti kompania nga agaramid agingga iti 2.4 million dose.
Immapela ti World Health Organization a kasapulan ti panagtitinnulong dagiti pagilian tapno maalay-ayan ti panagwaras ti nasao a sakit ken saan laeng idiay Africa.
Immunan nga inpadamag ti Sweden ti umuna a kaso ti baro a variant ti mpox iti ruar ti Africa.
