LAOAG CITY – Madanagan ti World Health Organization (WHO) ti inwayat a panangatake ti Israel iti oil facilities ti Iran.
Inbatad ni World Health Organization Chief Tedros Adhanom Ghebreyesus, adda ti negatibo nga epekto daytoy iti salun-at nangruna kadagiti ubbing ken dagiti nataengan.
Maysa kadagiti inladawanna ket adda dagiti gundaway a marugitan dagiti taraon, danum pakairamanan ti angin.
Maipalagip a kinumpirmaran ti Iran a tinamaan ti sumagmamano nga oil facilities-da iti Tehran ken kaparanget a probinsia nga Alborz a tinarget ti napagtipon a puersa ti Estados Unidos ken Israel.
Nagibales met ti Iran a nangiwayatda kadagiti missiles ken drones ken tinarget dagiti sumagmamano nga energy infrastructures nga asideg iti Arab Gulf states.
