LAOAG CITY – Nakigtot, naragsak ken nagaribungbong dagiti tattao a nagatendar iti Ati-Atihan Festival idiay Kalibo, Aklan, gapu ta saanda a ninamnama iti panagsangpet ti Wil To Win host a ni Willie Revillame.
Ad-adda pay a naragsak dagiti tattao idi nakipaset ni Willie iti grupo dagiti drummers nga agpabpabuya iti kalsada no sadinno a nag-drums daytoy.
Dati a drummer ti banda ti TV host isu a malasin ti gagarna nga ag-drum.
Napigsa ti panagpalakpak ken pugkaw dagiti tattao iti lugar a nakitada ni Willie iti maysa a free show.
Kadua ni Willie dagiti Wil To Win co-hosts nga isuda Almira Teng, Camille Canlas ken Fatima Bisan.
Nagyaman isuda gapu iti nabara a panangsaraboda kadakuada.
