LAOAG CITY – Inbatad ni Police Major Joseph Baltazar, ti chief of police iti ili ti San Nicolas a ti Wing Van a nakadinnungpar ti maysa a motorsiklo iti paset ti Barangay 3 iti nasao nga ili ket nagkarga kadagiti pebbles.
Nabigbig ti driver ti wing van a ni Lenato Reyes y Ganito, agtawen 49 ken residente iti Brgy. San Marcelino iti ili ti Dingras.
Immun-una iti daytoy, pimmusay ti nangiturong ti motorsiklo a ni Arvin Domingo y Pascua, residente iti Brgy. 60-B Madiladig ditoy siudad ti Laoag gapu iti napasamak a desgrasya.
Iti panagimbestigar dagiti otoridad ket ditoy a naduktalan da a ti wing van ket nagkarga kadagiti pebbles a maipagarop a naggapo iti Barangay Caruan iti ili ti Pasuquin a maipan koma idiay Bulacan ngem awan ti naipakita ti driver a papeles para iti pannakabiyahe dagitoy.
Segun ken ni Baltazar, ti palawag ni Reyes ket adda iti boss na ti papeles ngem agpapan maisursurat daytoy a damag ket saan pay a napan nagparang ti boss na.
Inpakaammo ni Baltazar a ti napan ket ti pamilya ni Reyes gapu ta napan da binalunan daytoy ken ti kadwa na a pahinante.
Iti agdama, kuna ni Baltazar a naiget ti panangiberberipikar da iti Quarry Council mainaig iti panagibiyahe ni Reyes kadagiti pebbles.
Nupay kasta, inpetteng na a para kenkuana ket adda ti linabsing ni Reyes gapu ta no agala ken agibiyahe ti pebbles ket masapol nga adda ti ig-iggaman a papeles manipod Quarry Council.
Immun-una iti daytoy, kayat dagiti maseknan nga iyakar iti sabali a lugan dagiti pebbles ngem inbilin ni Baltazar iti imbestigador na a saanda a garawen ti wing van tapno adda ti ebidensya da.
