LAOAG CITY – Inrekomendar ti Department of Labor and Employment (DOLE) kadagiti employer a mangipatungpal kadagiti addang tapno maprotektaran dagiti mangmanggedda iti kinabara ti panawen.
Kangrunaan nga insingasing ni Department of Labor and Employment Bureau of Working Conditions (BWC) Director Alvin Curada ti panag-adjust ti oras ti trabaho nangruna kadagiti mangmangged nga exposed iti direkta ti init kas kadagiti adda iti construction industry.
Inbatadna a nataltalged no ti oras ti trabaho manipud iti alas-6 agingga iti alas-11 ti bigat ken agsublida iti oras ti alas-2 agingga iti alas-5 wenno alas-6 ti malem.
Malaksid iti daytoy, nairekomendar ti pannakaipatungpal ti buddy system no sadinno nga adda ti katinnulungan ti tunggal mangmangged tapno mabantayan ti kasasaad iti tunggal maysa.
Kabayatanna, nairekomendar pay ti panangipaay ti regular a break tunggal dua wenno tallo nga oras tapno maikkan ti gundaway ti bagi a makainana ken makasubbot manipud iti napudot a paniempo.
