LAOAG CITY – Inbatad ti Department of Health nga adda laeng ti maysa a dentista a para iti kada 53 ribo a Pilipino.
Inlawlawag ti ahensya a ti rekomendasyon ti World Health Organization ket kasapulan ti maysa a dentista iti kada 7,500 a pasyente.
Gapu iti daytoy,kuna ni Health Undersecretary Emmie Liza Chiong nga ilungalong da ti pannakaisubli ti Bureau of Oral Health para iti pannakailatang ti nangatngato a pondo para kadagiti dental health programs iti Pilipinas, no sadinno a ti mabayadan para iti dental procedures ket saan a kabaelan dagiti marigrigat.
Inpetteng ni Chiong nga adda laeng ti 0.14 percent manipod iti budget ti Department of Health ti nailatang para kadagiti oral health programs.
Inpaganetget ni Chiong a napateg ti pannakatagiben dagiti ngipen gapu ta no mabaybay-an ket dakkel ti epekto na iti salun-at ti maysa a tao.
