LAOAG CITY – Inlawlawag ni Mayor Rafael Benemerito iti ili ti Pagudpud a saan a barko ti nag-emergency anchor iti baybay a paset ti Barangay Balaoi iti nasao nga ili idi Mayo 25 ita a tawen.
Segun ti mayor, ti nag-emergency anchor idi Mayo 25 ket maysa laeng a yate ngem pimmanaw met laeng a dagus.
Inbaga na a basar iti report kenkuana ti Municipal Disaster Risk Reduction and Management Council (MDRRMC) ket nag-emergency shelter ti yate gapu ta napigsa ti tudo.
Innayon na a ti yate ket kukua ti gangannaet ngem saan da a masigurado no ania a pagilyan ti naggapoan na.
Inpasingked na nga awan ti rumbeng a pakaalarmaan dagiti residente gapu ta awan ti bimmaba manipod iti yate ken pimmanaw met laeng a dagus iti nasao a lugar.
Malaksid iti yate ket adda pay ti fishing boat a naggapo iti Bicol a napan iti ili ti Pagudpud ngem inpasigurado ti mayor nga am-ammo na ti operator na.
