LAOAG CITY – Kinumpirmaran ni Lt. Commander Alexander Corpuz, ti mangidadaulo iti Philippine Coastguard ditoy probinsya nga adda ti maysa a koreano a naistranded iti baybay a paset ti Barangay Victoria iti ili ti Currimao kalpasan a naperdian ti yate na.
Segun ken ni Corpuz, ti koreano a ni Han Bae Sur, agtawen ti 46 ket naggapo idiay San Fernando, La Union idi Oktubre 24 ita a tawen.
Kuna na nga agawid koman iti pagilyan da a South Korea ngem nabuttawan ti datar ti yate na gapu kadagiti dadakkel nga allon ti baybay idi adda iti paset iti Barangay Victoria iti nasao nga ili rason a napilitan a nagsardeng.
Innayon ni Corpuz nga addan ti uppat nga aldaw a saan a nangnangan ti nasao a gangannaet gapu ta biscuit ken de lata laeng dagiti balon na.
Kabayatanna, inpasingked ni PO1st Class Marlon Borromeo, ti deputy commander ti Philippine Coastguard ditoy probinsya nga insigida a sinukisok da ti yate ti gangannaet ket awan dagiti nakita da a kontrabando.
Inpakaammo ni Borromeo a kiniddaw ti gangannaet a paguyud da ti yate na uray agingga laeng idiay Japan, ngem masapol nga ikoordinar da iti nangatngato a sangay ti opisina da.
Naamoan nga immay ditoy Pilipinas ti Koreano gapu ta binisita na ti nobya na nga adda idiay La Union.
